NAGTOO si Gov. Juliette T. Uy sa kabag-ohang dala sa lalawigan sa Misamis Oriental pinaagi sa mga planong pagpakunhod sa presyo sa kuryente. Kini ang sentro sa gipadayag nga mensahe ni Gov. Juliette T. Uy atol sa 56th franchise-wide Annual General Membership Assembly (AGMA) ug 58th founding anniversary sa Philippine’s Pioneer Electric Cooperative niadtong Mayo 16, 2026 sa Misamis Oriental Rural Electric Service Cooperative (MORESCO) 1 nga nahimutang sa lungsod sa Laguindingan. Gipaabot ni Gov. Uy ang tinguha niini nga kanunay siyang maduolan og unsa man ang panginahanglan sa MORESCO 1. Labina ang tumong niini mao ang kinatibuk-ang pagpa-develop sa lungsod nga samot mapaila usab ang tibuok Mis Or.

Duyog sa maong selebrasyon gihisgutan usab ang mga umaabot plano aron masulbad ang mga hagit kalabot sa power sourcing o connection. Andam usab nga makig-timbayayongay tali kagamhanang probinsyal ug MORESCO 1 aron matuman ang tanang pangandoy sa umaabot. Samtang gibalik-lantaw ang mga kalamposan sulod sa katuigan kung asa dedikasyon sa pag-serbisyo sa katawhan ang nahimong pundasyon ug inspirasyon sa grupo. Mihatag og tagsa ka mahinungdanong mensahe sila si MORESCO-1 Board President Joy Gil S. Mahinay, National Electrification Administration (NEA) Board of Administrator Jovel B. Ubay-Ubay, National Grid Corporation of the Philippines (NGCP) Consultant Pedrito Baculio, ug Laguindingan Mayor Atty. Roy Maqua. Anaa usab nanguna sa kalihukan si MORESCO-1 General Manager Engr. Collen B. Tarcelo uban ang mga kadagkoan sa naglambigit nga mga ahensya ug mga opisyales gikan sa LGU- 2nd District.

Ang tanang misalmot nga Member-Consumer-Owners (MCOs), leaders, employees, ug stakeholders labihan usab ang kalipay nga gipasigarbo ang mahimong kabahin sa selebrasyon. Tema karong tuiga kay “MORESCO 1 Power: Governance Stronger, Service Smarter, Future Brighter”.

By: Rejiann Ammor R. Maygay/PIO

Hulagway kuha ni: Jezreel Ecuacion/PIO