NAGKAHIUSA ang Misamis Oriental Federated Senior Citizens Association of the Philippines nga gipangulohan ni Mr. Natalio Liares, kauban ang OSCA Head League of Misamis Oriental President nga si Mr. Benjamin Medina, (OHLEMO) ug ang mga Presidente ug Representate sa matag lungsod ug dakbayan sa lalawigan. Sa ikaduhang higayon nga panagkita, gipangusgan pa gyud ni Governor Juliette Uy ang iyang hugot nga suporta alang sa mga programa sa atong mga senior citizen sa tibuok Misamis Oriental. Gipasabot ni Gobernadora nga ipadayon ug buhion pag-usab ang mga nahunong nga kalihokan sama sa Senior Citizen Convention 2025.

Gidani usab ni Gobernadora ang mga senior citizen nga mosalmot sa kalamboan sa turismo pinaagi sa pagpasigarbo sa mga lokal nga talan-awon sa ilang lungsod ug dakbayan. Gihangyo usab nga magamit ang social media ug teknolohiya aron mahimong mas inklusibo ang turismo ug mas makita ang kaanyag sa atong probinsya. Malipayon ang atong mga senior citizen nga mas mapalapdan pa ang ilang partisipasyon sa mga kalihokan ug mas mapaminaw ang ilang tingog sa sektor.

By: Zyrus James Gelizon/PIO

Hulagway kuha ni: Jezreel Ecuacion/PIO