MIKORTESIYA sa buhatan Governor Juliette Uy ang mga kadagkoan sa Northern Mindanao Medical Center (NMMC) sa pagpanguna ni Chief Dr. Jose Chan. Sentro sa ilang gihisgotan ang mga future collaborations tali sa ilang ahensya ug sa Panggamhanang Probinsyal. Atol sa ilang panagtigom, mihangyo ang NMMC nga magpabilin ang kalimpyo sa taliwala sa duha ka ahensya. Usa sa ilang gihangyo ang pagbutang og “No smoking” signages alang sa kahimsog sa panglawas sa mga pasyente sa ospital.
Samtang, gibutyag ni Dr. Chan nga andam kining makigtimbayayong sa Panggamhanang Probinsyal pinaagi sa implementasyon sa Universal Health Care Law hilabina sa referral system sa mga pasyente gikan sa mga kalungsuran. Gihangyo usab sa ospital ang pagsulbad sa sakyanan sa mga pasyente nga ma-discharge aron maakomodar sa pag-uli sa ilang lugar. Hugot ang suporta sa NMMC sa probinsya pinaagi sa padayon nga pag-atiman sa matag Misamisnon nga mudangop sa ilang ospital.
Suportado sa gobernador ang NMMC ug hugot ang pakigtimbayayong aron padayun nga maserbisyohan ang matag Misamisnon nga mudangop sa ilang balay-tambalanan.
By: Jane Salimbao/PIO
Hulagway kuha ni: Charm Andy Pacamalan/PIO
