MGA PANAGTIGOM NAHIMONG POSIBLE SA VIDEO CONFERENCING NGA INISYATIBA NI GOV. BAMBI

Posted: May 21, 2020

2152020-3

NIINING hugot ang pakigbatok sa lalawigan sa Misamis Oriental nga malikayan ang pagkaylap sa Corona Virus Disease (Covid-19).
Lakip sa mga gabayan nga angayan malikayan ug gidili mao kining mga dagkong panagtapok sama sa mga conferences, turn-overs, dagkong kalihokan ug uban pa nga mga kasaulogan.

Sa pagkanselar sa maong mga kalihokan karon panahona ug maobserbahan ang kadisiplina sa gipatuman nga social distancing mismong si Governor Bambi Emano nag-inisyatiba nga ang tanan kalihokan ug mga panagtigum sa mga nagkalain-laing lideres, ulo sa departmento sa kapitolyo probinsyal ug labaw sa tanan ang mga miyembro sa Provincial Task Force for Covid 19 ang ipaagi na lamang sa Zoom video conferencing.
Dinhi nakita ug nadiskubre sa gobernador ang importansya niini nga application ug kabililhon sa social media.
Nag-aghat si Gov Bambi sa tanan lideres sa pagsagop niining bag-ong pamaagi sa panagtigom ug pag- storyahanay pinaagi ning maong apps labina kung kusog ug stable ang internet connection sa tagsa-tagsa ka mga lokasyun.
Matud sa Gobernador atol sa video conferencing sa Provincial Development Council Meeting niadtong Abril 24, 2020 nga kung ang tanan mosagop ning bag-ong teknolohiya hilabina ang gobyerno mamahimo nga dako kini og tabang nga makadaginot sa kantidad nga gikan sa buluhisan sa katawhan.

Gidugang sab niini nga adunay positibo nga hatud ang epedimya gumikan kay naghatag kini og maayong leksyon nga masagup ang bag-ong oportunidad ug bag-ong pamaagi usa na niini ang internet nga gitudlo hilabina sa mga hingkod ang pangidaron nga wala kaayo kahibawo sa natad sa social media.