PADAYONG gipahugtan sa Panggamhanang Probinsyal pinaagi sa Provincial Health Office ang paghatag pagtagad sa mga programang panglawas sa lalawigan. Atol sa flag raising ceremony adlawng Lunes, Mayo 11, gitanyag sa buhatan ang ilang mga kalampusan gikan sa tuig 2025 hangtud sa kasamtangan kauban sa walo ka provincial hospitals sa probinsya.
Isip representante ni PHO-OIC Dr. Bebina Casiño, gipresentar ni Dr. Ted Yu ang dakong rekognasyon nga naangkon sa probinsya gumikan sa padayong pagserbisyo sa nagkalain-laing programa sama sa maternal health, family planning, nutrition, communicable diseases ug uban pang public health programs. Gipahibalo usab ni Dr. Yu nga ang Misamis Oriental usa sa 17 ka mga probinsya nga benepisyaryo sa World Bank Project ubos sa Health System Resiliency Program (HSRP) diin mahatagan sa dakong pondo ang unom ka mga hospital, pito ka Rural Health Unit (RHU) lakip ang Provincial Health Office diin makadawat og kapin 50 Milyones pesos sugod sa tuig 2027 hangtud 2029.

Atol sa kalihokan, gipasundayag sa mga MOPH Chief of Hospitals ang ilang accomplishment reports partikular sa admissions, discharges, patient outcomes, patient satisfactory survey, OPD-YAKAP services, OPD Consultation, laboratory services, hospital income ug uban pang serbisyo. Gipakita usab sa mga ospital ang ilang binulan nga mga kalihokan sama sa buntis classes, trainings, pahina, health promotions alang sa cancer awareness, rabies awareness ug capacity development programs. Mapasigarbohon usab nga gipahibalo sa pipila ka chiefs nga nakaangkon ang ilang ospital og 95 hangtud 97% nga satisfaction rate nga nagpakita nga bisan pa sa mga hagit, nagpabiling malipayon ang mga pasyente sa dihang mubiya sila sa ospital. Matud ni Dr. Vinaflor Realista, MOPH-Manticao Chief of Hospital, naangkon nila kini nga porsyento gumikan sa ilang padayong paningkamot nga matubag ang panginahanglanon sa matag pasyente.

Dugang pa niya, malaumon sila nga mas mapalig-on pa ang ilang serbisyo aron mas daghan pang katawhan ang matabangan. Gipunting usab ni Dr. Andrew Solomon Echavez nga ang ilang ospital mahimong pioneer sa Solid Waste Management Energy o SWEEP, usa ka smart waste energy initiative diin ang hospital waste mahimo nang ma-convert ngadto sa enerhiya nga makatabang sa pasilidad. Sa ilang report, ang MOPH-Talisayan ug MOPH-OWWA Alubijid maoy duha sa mga recipient sa Health System Resilience Program (HRSP) nga gipondohan sa Department of Health ug World Bank. Kabahin kini sa inisyatiba ni Governor Juliette Uy nga maghatag og dugang pondo sa mga MOPH aron matubag ang ilang mga panginahanglan sama sa pag-upgrade ngadto sa Level 2 hospitals ug pagdugang og mga pasilidad sama sa Intensive Care Unit (ICU), Neonatal Intensive Care Unit (NICU), upgraded Operating Room, ug OPD Building nga adunay Hemodialysis Unit.

Kahinumduman, ubos sa liderato ni Governor Uy, padayon nga gipaningkamotan sa probinsya nga masiguro ang accessible ug kalidad nga health care services alang sa tanang katawhan sa Misamis Oriental.

By: Jane Salimbao/PIO

Hulagway kuha ni: Charm Andy Pacamalan/PIO