GIPAHIGAYON sa Misamis Oriental Provincial Development Council (PDC) ang regular nga miting adlawng Huwebes – Hulyo 23, 2026 sa Unity Hall, Capitol Grounds. Atol sa katiguman gihisgutan ug giendorso ang nagkadaiyang Programa, Proyekto, ug mga plano nga nagpunting sa padayon nga kalamboan sa probinsya. Lakip nga gihisgutan sa katiguman ang pag-endorso sa konseho sa pipila ka mga prayoridad nga proyekto ilalom sa Supplemental Investment Program (SIP, paghatag og farm inputs o abono alang sa mga tobacco farmers sa Initao, pagtukod sa Double “A” Slaughterhouse nga adunay cold storage sa Laguindingan, pagpalambo sa Pelaez Sports Complex ug rehabilitasyon ug pagpalapad sa Provincial Capitol Building.
Gipresentar sa Department of Public Works and Highways (DPWH) Region X ang mga infrastructure projects nga ipatuman sa Misamis Oriental ubos sa FY 2026 General Appropriations Act (GAA) nga giendorso sa konseho ngadto sa Regional Development Council (RDC). Gihisgutan usab ang FY 2027 Annual Investment Program (AIP) sa probinsya ug ang FY 2027 Budget Proposal sa Provincial Environment and Natural Resources Office (PENRO) Misamis Oriental, nga parehong giendorso aron masuportahan ang dugang pang mga programa alang sa kalamboan ug pagpanalipod sa kinaiyahan. Lakip sa mga presentasyon mao ang Green Solid Waste Management Solution for Cleaner Communities in Misamis Oriental, nga gisang-at sa Provincial Environment and Natural Resources Office (PLENRO) alang sa endorsement ngadto sa Sangguniang Panlalawigan.
Gituki usab sa Department of Agrarian Reform (DAR)-Misamis Oriental ang Inclusive Partnership with Agrarian Reform Communities (IPARC) Project, samtang ang DILG-Misamis Oriental nangayo og suporta alang sa implementasyon sa Public-Private Partnership Governing Board (PPPGB) Resolution No. 2025-06-02. Usa usab sa mahinungdanong presentasyon mao ang Central Mindanao High Standard Highway Construction Project nga naghatag og kasayuran sa kahimtang ug direksyon sa maong dakong imprastraktura nga gilauman nga pag asenso sa ekonomiya sa Rehiyon. Kahinumduman nga ubos sa liderato ni Governor Juliette Uy nagpadayon ang Kagamhanang Probinsyal sa pagpalig-on sa koordinasyon aron masiguro ang mga Programa ug Proyekto nga motubag sa panginahanglan sa katawhan ug maghatag dugang kalambuan sa Misamis Oriental.
By: Ellen Mae Lahinao/PIO
Hulagway kuha ni: Charm Andy Pacamalan/PIO
