MISOR COVID-19 TASK FORCE, DUNAY BAG-ONG PAHIMANGNO

Posted: June 26, 2020

26062020-6

KAMULO karong adlawa, Hunyo 23, ang Provincial Task Force for COVID-19 sa ilang panagtapok alang sa paggama og bag-o ug dugang guidelines sa ilang preparasyon kon ugaling adunay mahitabong local transmission sa coronavirus disease 2019 sa Misamis Oriental.
Lakip sa panagtapok si Gov. Bambi Emano, kinsa maoy mimando nga himuon kini sa task force nga gipangulohan ni Dr. Jerie Calingasan, aron masiguro nga walay kagubot, kalibog ug kataranta ang katawhan kon ugaling matala, simbako, ang pagtakboy sa virus nga magsumikad mismo sa lalawigan.
Nagtuo si Gov. Emano nga kon walay masayang nga oras ug kon kanunay “one-step ahead” sa pagpakabana ang kadagkoan sa lalawigan, hilabina ang task force, dili imposible nga magpadayon nga zero local transmission gihapon ang Misamis Oriental.
Ning pagbalita, kamulo pa’g gama ang grupo sa bag-ong guidelines nga ipatuman sa lalawigan kalabot niini nga hisgotanan.