MISOR DEPED, PRAYORIDAD ANG KAHIMSOG SA ESTUDYANTE

Posted: June 22, 2020

NAKATAKDA nang magbukas ang klase sa Agosto 24, 2020, base sa gipahayag mismo ni Sec. Leonor Briones. Dinhi sa Misamis Oriental, gisiguro ni Schools Division Superintendent Jonathan Dela Peña ang luwas nga pagtungha sa estudyante ug magtutudlo.
Sa iyang pagbisita atol sa regular session sa Sangguniang Panlalawigan, gibutyag ni Mr. Dela Peña nga sa ilang gipahigayon nga survey, migawas nga daghan ang uyon sa modular learning method tungod kay dili tanan adunay gadget or laptop ug maka-afford sa internet connection kon himuon kining virtual learning method. Ang modular learning method, matud ni Mr. Dela Peña, hatagan sa booklet ang magtutungha nga ilang tun-an sa balay kauban ilang mga ginikanan.
Pasabot ni Mr. Dela Peña, desisyon gihapon sa mga ginikanan kung tugotan nila mag-enroll ilang mga anak karong School Year 2020-2021. Apan, walay mahitabong klase nga “face to face,” aron masiguro nga walay mataptan sa coronavirus disease 2019 sa mga magtutungha, ginikanan ug magtutudlo.