MISOR ENVIRONMENT OFFICE, MIDONAR OG P35,000 SA NMMC FRONTLINERS

Posted: April 23, 2020

92927076_588591428418546_2713126060584599552_o

SA ilang kaikag nga makatabang uyamot sa atong mga frontliners, midonar og P35, 000 ang mga kawani sa Provincial Environment and Natural Resources Office (PENRO) ngadto sa Northern Mindanao Medical Center (NMMC). Aron masiguro nga mahidangat gayud ang ilang kontribusyon ngadto sa NMMC, gipaagi nila ang donasyon kang Gov. Bambi Emano.

Sulti pa ni Mr. Benjamin Jao-jao, ang Chief Management Services Division sa PENRO-Misamis Oriental, nagpatak-patak sila aron makatigum sa nasangpit nga kantidad.

“Nagpasalamat ta sa atong gobernador sa Misamis Oriental sa pagdawat ani nga hinabang. Kini, tungod sa initiative sa atong personnel, nagapadayon ta paghatag ug hinabang, para makatabang sa uban nga nanginahanglan,” segun pa ni Mr. Jao-jao.

Butyag ni Mr. Morito Estifano, ang OIC Chief Technical Services Division sa PENRO-MisOr, nagpatak-patak usab sila og pangpalit og bugas ug canned goods nga ilang gitunol sa mga habal-habal drivers sa Malasag, Cugman, Cagayan de Oro City, nga nawad-an intawon sa panginabuhi tungod sa nasinating krisis nga dala sa coronavirus disease 2019 (COVID-19).