MISOR FINALIST SA QUALITY NUTRITION PROGRAM

Posted: July 20, 2020

2072020-6

MAPASIGARBUHON nga gipahibalo ni Provincial Health Office Nutrition Division Head Ms. Marites Gomez nga pinakaubos ang lalawigan sa Misamis Oriental sa upat ka indicators sa malnutrition nga mao ang underweight, stunting, wasting ug overweight/obesity.
Base sa 2019 Operation Timbang Plus (OPT plus) result nga gipagawas gikan sa National Nutrition Council X , ang probinsya sa Misamis Oriental sa liderato ni Gobernador Bambi Emano ang adunay pinaka-ubos sa prevalence on stunting kumpara sa lima ka probinsya.
Nagtugma pag-ayo ang tema karong tuiga nga “Batang pinoy SANA TALL, Iwas Stunting SAMA ALL! Iwas ALL din sa COVID-19” kon diin ang selebrasyon nakapukos sa katas-on sa bata sa ilang unang 1, 000 ka adlaw.
Gumikan niini nahimo ang lalawigan nga finalist sa Quality Nutrition Program initiative tungod sa pinaka ubos nga prevalence of stunting sa mga nag-edad og 0-59 months.
Bisan paman sa nagpadayong hulga nga hatud sa Corona Virus Disease (Covid-19) positibo gihapon ang buhatan sa pagpanguna ni Ms. Gomez nga makab-ot sa probinsya ang maong pasidungog tungod sa tabang sa mga Barangay Nutrition Scholars o (BNS).