MISOR, MGCQ NA

Posted: June 2, 2020

262020

SUGOD karong adlawa, Hunyo 1, 2020, gipaubos na sa Modified General Community Quarantine ang entero Misamis Oriental. Kini, base sa mando sa National Inter-Agency Task Force on Emerging Infectious Diseases, pinaagi sa Resolution No. 40, series of 2020, pinetsahan Mayo 27, 2020, human gibutang sa low-risk area category ang entero Rehiyon 10 kung hain nahimutang ang Misamis Oriental.
Gikataho nga niadtong Mayo 31, 2020, expire na ang General Community Quarantine (GCQ) sa nasangpit nga rehiyon. Buot pasabot, medyo luagan na ang paglihok-lihok sa mga tawo ug negosyo, apan padayon pa gihapon ang pagsuot sa facemask, social distancing ug hugas sa kamot personal hygiene.
Lakip sa gitugotan ubos sa MGCQ ang social gatherings susama sa pagsimba, birthday ug uban pang silibrasyon, sa kondisyon nga 50 porsiyento lamang sa kapasidad sa isa ka tigumanan ang tugotan nga makasulod o makatambong. Wala pay mass gathering sa mga estudyante, susama sa pagtungha sa klase sa mga tulunghaan nga gitugotan.
Bukas na usab ang sagad sa mga tindahan ning panahona, susama sa restaurant, hardware, hotel, bar, cafes, gym, spa, barber shop, ug salon sa kondisyon nga 50 porsiyento pa gihapon sa kapasidad ang makasulod. Lakip niini mga mall ug shopping center.
Gitugotan na usab ang sports enthusiasts sa ilang fitness activities, apan limitado lamang sa non-contact events, susama sa tennis, badminton, skateboarding, equestrian, jogging, running, biking, golf, ug swimming.
Sugod usab karong adlawa, gitugotan na mag-operate balik ang construction projects pribado man o gobyerno. Bisan mga tourist destination, travel agencies, tour operators, reservation service, karaoke bars, sinehan, libraries, museum, cultural centers, ug legal nga pasugalan.
Gitataw usab nga ubos sa MGCQ, mahimo nang mogawas sa ilang panimalay ang tanang tawo, lakip senior citizens, buros ug adunay gihambin nga respiratory problems.