MISOR PABILING LUWAS SA AFRICAN SWINE FEVER

Posted: July 20, 2020

2072020-5

NAGPABILIN nga luwas ang probinsya sa Misamis Oriental sa makapatay nga sakit sa baboy kon African Swine Fever (ASF).
Human nagmalampuson ang buhatan sa Provincial Veterinary Office (PVET) sa pagpangulo ni Dr. Benjamin Resma sa pagsugpo sa maong sakit nga makamatay sa baboy.
Suportado usab kaayo ni Governor Bambi Emano ang mga lakang ni Dr. Resma kay lakip sa gikabalaka niini nga ugaling makasulod kini nga sakit sa mga baboy dako kaayo kini nga epekto sa mga hog raisers lakip pa sa konsumante.
Gikumpirma ni Dr. Resma nga hangtud karun, wala pay kaso sa ASF sa tibouk probinsya taliwala adunay mga kaso sa pagkamatay sa baboy sa Brgy. San Nicolas sa lungsod sa Jasaan.
“Sa pagkakarun, so far, our province is still free from ASF, wala pay natala nga mortalities because of it.” Matud ni Dr. Resma ug nipasabot nga ang mga pig mortality sa nasangpit nga lungsod nagikan sa bakterya nga maoy kasagaran gakamatyan sa mga binuhing baboy.
Niadtong Hulyo 2, 2020 nangolekta ang PVET ug blood samples para sutaon kon ASF ba gyud ang hinungdan sa pagkamatay sa maong mga baboy ug gipasalamatan nga negatibo sa ASF ang resulta sa mga blood sample testing nga migawas pagka upat ka adlaw.
Aron nga magpabiling luwas ang lalawigan sa Swine Fever mas gipahugtan pa ang checkpoints nga nahimutang sa mga entry ug exit points gikan sa lungsod sa Magsaysay ug Lugait arun masuta kon luwas sa sakit ang tanan mananap nga musulod sa probinsya.
Gisiguro sab sa buhatan nga ang mga pork products, buhi man o karne, masiguro nga walay kontaminasyon ug sakit nga ASF hinungdan pulos gi-ban tanan produkto sa karne nga gikan sa lugar nga adunay inpeksyon sa ASF. Dako kaayo og tabang ang executive order ni Gov. Bambi nga dili ipasulod ang maong mga produkto sa probinsya.
Tungod sa ilang gipakusgan nga kampanya batok sa paglikay sa ASF gipaniguro sa buhatan ni Dr. Resma nga ang tanan karne ug uban pang produkto sa baboy sa Misamis Oriental ang luwas nga pangkonsumo busa walay angay ikabalaka ang katawhan sa pagkaon niini.