MISOR, PASADO SA 2019 GOOD FINANCIAL HOUSEKEEPING

Posted: February 28, 2020

img_00105

NAGPAGAWAS sa opisyal nga listahan sa 2019 Good Financial Housekeeping Passers ang Department of the Interior and Local Government ning bag-o, ug isa ang pangagamhanang lokal sa Misamis Oriental ubos sa pagdumala ni Gobernador Bambi Emano nga nalakip sa listahan.

Nakasulod usab ang dakbayan sa El Salvador ug Gingoog sa city category, samtang ang 23 ka lungsod sa lalawigan lakip usab sa topnotcher alang sa municipality category.

Hilabihan kalipay ni Gobernador Emano samtang iya kining gipahibalo sa kahanginan pinaagi sa programang Lambo Misamis Oriental sa RPN DXKO. Buot ipasabot, nakita sa DILG nga adunay sihag, katarong ug kaligdong ang pagpamunuan sa kasamtangang administrasyon.

Matud sa gobernador, resulta kini sa paningkamot sa LOCAL FINANCE COMMITTEE, mga ulo sa departamento, ug sa SANGGUNIANG PANLALAWIGAN, sa pagsunod sa lagda sa balaud nga gamiton lamang ang pundo sa gobyerno sa hustong paagi, walay pag-abusar ug walay pagpangawkaw.

Nanghinaut si Gobernador Bambi Emano nga dili lamang hangtud sa tuig 2019 mahimong awardee ang Misamis Oriental, duha ka dakbayan ug 23 ka lungsod, apan hangtud sa hangtud kinahanglan adunay kasihag, katarong ug kaligdong ang pagserbisyo sa katawhan ug dili kawatan sa bahandi ang katawhan nga naghalad sa ilang dugo ug singot aron lamang makabayad sa buwis.