MISOR, SA FICCO MAPASALAMATON

Posted: May 21, 2020

2152020-6

MAPASALAMATON uyamot si Gov. Bambi Emano sa First Community Credit Cooperative (FICCO) tungod sa hinabang nga gitunol niini ngadto sa mga frontliners sa Misamis Oriental. Saad sa gobernador, gawas nga gamiton ug ampingan ang ayuda nga dili maabusahan, kinahanglan gayud modangat kini sa angay padulngan.
“We are trying to be transparent as possible especially in times of crisis, which is not an opportunity to take advantage,” walay lipod-lipod nga sulti ni Gov. Emano atol sa gipahigayong ceremonial turnover sa 240 pieces personal protective equipment (PPE) suits, 160 gallon sa alcohol, 240 pieces sa face shield, ug 650 packs sa Pinakbet seeds alang sa mag-uuma sa lalawigan. Gikan sa FICCO Community Outreach Foundation Inc. (FCOF) ang maong mga hinabang.
Wala damha ni Mr. Edgardo Micayabas, chief executive officer sa FICCO, nga sobra kalipay sa amahan sa lalawigan sa Misamis Oriental, bisan sa “gamay” nila nga hinabang.
Sumbalik, nagpasalamat si Gov. Emano ngadto sa pamunuan sa FICCO, tungod kay daku gayud kaayo ang demand sa PPE, alcohol, face mask ug face shield ning pagpakigbatok sa coronavirus disease 2019 (COVID-19).