OPISYAL nang gikoronahan ang pinakabag-ong grandwinner isip Miss Kuyamis 2026 nga si Ms. Rexzil Paayas gikan sa lungsod sa Manticao atol sa gipahigayong coronation night sa LGU-Villanueva sa lalawigan niadtong Enero 9 ning tuiga. Giila usab isip 1st runner up si Ms. Desiree B. Gamolo gikan sa lungsod sa Tagoloan, 2nd runner up mao si Farra Ellysa M. Cain gikan sa Sugbongcogon, 3rd runner up mao si Cristyn Ffion F. Lewis gikan sa Opol ug 4th runner up mao si Lynn Eirene J. Lomongo gikan sa El Salvador City.
Matud ni Ms. Paayas, inspirasyon niini aron marepresentahan ang ilang lungsod sa Manticao ug aron mapasundayag ug masuportahan ang panglantaw sa pagpalambo sa turismo sa probinsya. Isip magsilbing ambassadress sa Misamis Oriental hilabina sa turismo, usa sa iyang gilantaw nga adbokasiya mao ang Community-based tourism hilabina nga nakasuroy kini sa mga tourist spots sa Misor gikan sa mga kabukiran, waterfalls ug kadagatan ug nagtinguha mas ma-explore pa ang mga ubang mga destinasyon sa probinsya.
Tinguha ug plano usab niini nga makahimo og mga adventure sa mga komunidad aron makatabang sa mga local guides subay sa iyang Project RISE kon Respect nature, Inspire adventure, Sustain communities and Empower growth. Mapasalamaton si Ms. Paayas kang Governor Juliette Uy ug gidayeg ang liderato niini isip usa ka babaye nga lider tungod sa pagpadayun sa legasiya sa Miss Kuyamis.
Ang Miss Kuyamis 2026 usa sa highlight sa selebrasyon sa 13th Kuyamis Festival ning tuiga ug giila usab nga ginaatangan matag tuig sa probinsya.
By: Jane Salimbao/PIO
Hulagway kuha ni: Marvin Gilig/PIO
