PORMAL nang gilunsad sa probinsya ang Mobile Soil Laboratory sa pagpanguna sa Panggamhanang probinsyal ug Department of Agriculture-Bureau of Soils and Water Management ning adlawng Lunes, Agosto 3, 2026. Pinaagi sa Mobile Soil Laboratory, mas mapasayon ang pag-access sa mga mag-uuma sa maayong kalidad nga soil analysis nga maoy basihan sa hustong pagdumala sa ilang mga umahan. Ang maong ekipo nagkantidad og 43-milyones pesos nga adunay advanced analytical instruments, office spaces, laboratory facilities, essential resources ug safety features. Mahimo na kining magamit sa mga kalungsuran ug syudad sa probinsya gikan karong adlawa hangtud Oktobre 2 ning tuiga nga dala ang soil testing services ug himoong duol na sa mga mag-uuma ug mga local government units.
Gitakdang himoon ang deployment niini sa mga LGUs pinaagi sa clustering gikan Agosto 3-7 sa Provincial Capitol, Agosto 10-14 sa El Salvador City, Agosto 10-14 sa El Salvador City, Agosto 17-21 sa Gitagum, Agosto 24-28 sa Naawan, Agosto 31-September 4 sa Villanueva, Septiyembre 7-11 sa Balingasag, Septiyembre 14-18 sa Sugbongocon, Septiyembre 21-25 sa Kinoguitan ug Septiyembre 28-October 2 sa Gingoog City. Nanguna sa seremonya kauban ni Governor Uy sila DA Regional Executive Director Jose Apollo Pacamalan, Provincial Board Member Princess Emano ug mga mayores sa lalawigan. Hisayran ang Northern Mindanao mao ang unang rehiyon sa nasud nga nag-operate sa Mobile Soil Laboratory nga gisugdan niadtong Oktubre 15 sa probinsya sa Bukidnon nga gisundan sa Misamis Occidental ug Lanao del Norte ning ulahi.
Usa lamang kini sa mga programa isip suporta sa mga mag-uuma sa probinsya nga gilaumang makatabang alang sa mas produktibo, mas lig-on ug mas malungtarong sektor sa agrikultura sa probinsya.
By: Jane Salimbao/PIO
Hulagway kuha ni: Jez Ecuacion/PIO
