INTEGRIDAD ug pagsalig ang gipalig-on sa Misamis Oriental Provincial Corps (MOPC) alang sa mga myembro niini human sa ilang annual meeting and gathering niadtong Hunyo 3, 2026. Matod ni MOPC President Cheleste Simene-Jomaya, importante kini sa organisasyon tungod kay adunay gintang ang gobyerno ug ang katawhan. Gidugang niya, ang MOPC ang mahimong tulay niini aron mahatod sa katawhan ang tinuod ug insaktong impormasyon alang kanila. Ang MOPC ang pinakaunang organisasyon sa prensa nga natukod sa Kagamhanang Probinsyal ubos sa pagpamuno ni Governor Juliette Uy.
Gipaabot ni Governor Juliette Uy ang iyang hugot nga suporta sa organisasyon pinaagi sa paghatag kanila og media lounge nga mahimutang sa Kapitolyo. Gipresentar usab ni Governor Uy ang uban pa niya nga mga plano sa lalawigan, lakip ang renovation sa Don Gregorio Pelaez Sports Complex. Andam karon ang MOPC modawat og bag-ong mga myembro. Usa sa ilang mga requirements niini ang identification ug verification isip usa ka lehitimong media practitioner sa tanang klase nga media outlets.
Kahinumdomang opisyal nga namugna ang MOPC ug nanumpa ang mga opisyales niini niadtong Setyembre 2025. Gipasalig ni Governor Uy nga magpabilin ang iyang suporta sa organisasyon aron masigurong mapaabot nila ang mga balita nga makahatag og kaayohan ug kalamboan sa katawhan sa Misamis Oriental. Subay usab kini sa iyang BANGON strategic direction.
By: Nefilim Diaz/PIO
Hulagway kuha nila: Charm Andy Pacamalan & Jezreel Ecuacion/PIO w/ PIO Intern Karl Jaspe
