MOPH-BALINGASAG TEMPORARYONG SIRADO SA PUBLIKO

Posted: August 7, 2020

782020-3

NADESISYUNAN ni Provincial Task Force Chief for Covid-19 Dr. Jerie Calingasan nga temporaryo usa nga ipasirado ang Misamis Oriental Provincial Hospital – Balingasag (MOPH-Balingasag).
Ang desisyon sa ulo sa task force nagsumikad human nakabantay kini og mga senyales sa local transmission sulod sa maong balay tambalanan.
Tulo ka trabahante sa maong balay tambalanan ang nagpositibo sa Covid-19 samtang adunay laing upat ka positibo natala sa maong lungsod.
Niadtong Hulyo 31, 2020, mibyahe si Dr. Calingasan sa Balingasag ug nakig-istorya sa mga opisyales lakip kang Mayor Alexis Quina, Dr. Maria Helen Romualdo kinsa Municipal Health Officer sa lungsod, ug ang mga nagdumala sa Balingasag MOPH.
Nagkahiusa sila sa desisyon nga temporaryong pagpahunong sa serbisyo sa balay tambalanan.
Dungan sa temporaryong pagpasirado gipahigayon gilayon ang disinfection, lakip ang rapid testing sa pipila ka empelyado, pagpaubos og RT-PCR test ug isolation sa pipila human gitouhang adunay close contact sa nagpositibo sa virus.
Ang kasamtangang mga pasyente gipangdala usa sa mga MOPH duol sa lungsod arun didto ipadayon ang pagpanambal kanila.
Giawhag ni Dr. Calingasan ang kooperasyon sa mga balay tambalanan aron mabatokan kini nga pandemya.
Pabiling mibilib si Governor Bambi Emano sa mga lakang ni Dr. Calingasan tungod kay nasayod kini nga ang desisyon niini aron mapugngan ang pagkalat sa makamatay nga virus.