PULOS interesado ang mga Persons Deprived of Liberty (PDLs) mahitungod sa Uma Sa Balay nga programa kung asa gihingusgan sa kagamhanang probinsyal. Alayon kini sa tinguha ni Gov. Juliette T. Uy nga mapauswag ang kinatibuk-ang sektor sa Agrikultura ning probinsya. Sa maong rason usab nga gilakip ang mga kaigsuonang binilanggo nga hatagan sa susamang oportunidad. Pinaagi niini makakat-on sila sa pagpang-uma sama sa pagtikad og yuta nga dunay potensyal alang sa gardening ug livestock. Alang sa ikaduhang hugna, malampusong natigayon ang modular training nga gilangkoban gikan sa pag-lecture hangtud sa demonstration ug ang aktwal nga aplikasyon sa tanang inmates sa ilang naakat-onan. Sama sa soil composting ug ang paghimo og abuno alang sa vegetable gardening.

Anaa sila si PAGRO Consultant Perfecto Rom, Jr. ug Agriculture & Biosystem Engineer Evy. Elago nga maoy nagtanyag sa mga lectures. Gipasabot usab nila ang tumong sa USB program nga mao gayod ang food security. Ug lakip niini ang panlantaw nga sa umaabot maka- suplay usab ang MOPJ og mga utanon ug uban pang produkto gikan sa USB program nga mahimo nilang gigikanan sa income. Samtang si MOPJ Provincial Warden Ret. Police Major Rogelio Labor Jr. dako ang pagtoo nga mapatuman nila kini labina uban sa tabang sa kagamhanang probinsyal. Paningkamotan usab nila nga dili masayang ang oportunidad nga gihatag ug andam paluyohan ang gobernadora sa planong food sustainability ug dugang kapangitaan bisan sulod sa MOPJ.

Si alyas “Toto” nga usa sa inmates nga interesadong mosulay sa natun-ang proseso ug klase sa teknolohiya sa gardening dako kaayo ang pasalamat tungod eksayted usab kining makasugod sila. Mensahe usab niini nga ilang tagaan og bili kini pinaagi sa pagpangga sa umaabot nilang produksyon ug ang padayong pagkat-on og skills samtang anaa sa rehabilitative years. Ang USB nga programa matud pa kay usa lamang ka pamatuod sa kinasing-kasing nga pagpangga ni Gov. Uy ug ang paghatag patas nga pagtagad sa tanang sektor sa katilingban. Ubay-ubay na usab ang natabangan niini ug padayong gina- monitor ang progress sama sa mga mag-uuma ug fisherfolks lakip former rebels, ug uban pa.

Kini nga kalihukan gipangunahan sa Provincial Agriculture’s Office (PAGRO) sulod sa Misamis Oriental Provincial Jail (MOPJ) nga nahimutang sa lungsod sa Initao niadtong Mayo 20, 2026.

By: Rejiann Ammor R. Maygay/PIO

Hulagway kuha nila: Jezreel Ecuacion/PIO & PAGRO