MOPJ, LOCKDOWN PA GIHAPON KARON

Posted: June 3, 2020

362020-2

DILI pa gihapon pwede nga bisitahon sa ilang mga minahal sa kinabuhi ang mga binilanggo sa Misamis Oriental Provincial Jail and Rehabilitation Center (MOPJ) hangtud karong panahona hangtud nga hingpit nang luwas ang tanan gikan sa pagtakboy sa coronavirus disease 2019 (COVID-19).
Matud ni Provincial Jail Warden Dominador Tagarda, pwera-bisita pa gihapon ang MOPJ hilabina dili pa hingpit ang contact tracing sa dakbayan sa Cagayan de Oro kung diin nahimutang ang pasilidad sa may dalan Corrales-Luna.
Apan giklaro ni Warden Tagarda nga padayon gihapon nga dawaton ang pagkaon, tambal ug uban pa alang sa mga binilanggo gikan sa ilang pamilya, apan sa makuti nga pagsusi ug pagbantay ayha kini muabot sa ilang mga kamot. Sa gihapon, gipatuman ang social distancing gikan sa motunol sa niini ngadto sa gwardiya sa MOPJ.
Hinuon, wala man mapihig ug mingawon ang binilanggo nga makita ang ilang tagsa-tagsa ka pamilya, gamit lang ang e-dalaw kon electronic dalaw pinaagi sa internet.