MOPJ, NAKATUTOK 24 ORAS BATOK NCOV-ARD

Posted: February 21, 2020

86696097_549565742321115_5667462045767827456_n

NAKABANTAY 24 oras sa tibuok semana ang Misamis Oriental Provincial Jail and Rehabilitation Center (MOPJ) batok sa pagkatap sa Novel Corona Virus Acute Respiratory Disease.

Tungod niini, hugot ang kamanduan sa MOPJ nga magsuot gayud sa face mask kinsa man ang buot mosulod sa prison facility. Nunot niini, nagpagawas og memorandum si Provincial Warden Dominador Tagarda nga kinahanglan naka-mask ang mga mubisita hilabina kon adunay ubo ug sip-on.

“Kung musulod dani mugamit gyud ug mask pero necessary ang maggamit ug mask nga taga gawas ug taga sulod kong adunay ubo, sip-on kay mao mana ang advice sa PHO,” matud ni Warden Tagarda.

Samot na kadtong gikan sa gawas sa nasud nga buot mobisita sa pasilidad, kinahanglan nakapaubos na sa 14-day mandatory quarantine una pa makasulod ug maka-istorya ang mga binilanggo.

“Dunay mga posibilidad ana kong makaanhi dani amo silang harangon ug tan-awon ilang card ug na quarantine naba. Kung wala man galing ug wala silay mapakita so di sa namo sila ipasulod sa prisohan,” paniguro ni Warden Tagarda.

Dili tiaw ang nasinating kuyaw sa katawhan sa tibuok kalibotan tungod sa makamatay nga novel coronavirus. Dili usab ang pagpanalipod sa tanang ahensiya sa gobyerno ug pribado batok niini nga virus.

Apan pahinumdom ni Gobernador Bambi Emano, dili lang mag-panic, kinahanglan lang makisayod ug manglimpyo sa kaugalingon.