TINGUHA karon sa Kagamhanang Probinsyal nga masugpo ang pagtaas sa kaso bullying, depresyon ug uban pang problema sa mental health sa Misamis Oriental. Kini human naghatag og proposal ang Moral Recovery Officers Foundation Incorporation nga i-implementar ang Moral Enhancement Program niadtong Pebrero 24, 2025 sa Kapitolyo Probinsyal. Matod ni Cristy Rodriguez, usa ka opisyal sa maong organisasyon, nakita nila ang pagtaas sa kaso sa mga nahisgutang problema ug gikinahanglan kini nga masolusyonan.
Base sa proposal sa organisasyon, target nila nga mahatag kini nga programa sa mga tunghaan, bilanggoan, ug mga opisina sa lalawigan. Ang maong programa naghatag og hibug-aton sa importansya sa moral values pinaagi sa mga lecture sessions. Positibo ang reaksyon ni Provincial Governor’s Office (PGO) Chief-of-staff Eljure Quilang ug ang ubang opisyales sa kapitolyo nga ma-implementar kini nga proposal sa probinsya. Plano karon sa kapitolyo nga maghisgot ug dugang suhestyon alang niini. Ang Moral Recovery Officers Foundation Inc. usa ka non-profit organization sa nasod nga nagtutok sa paghatag hibug-aton sa moral values ug ethical behaviour nga gillangkoban sa nagkalain-laing relihiyon.
Hugot usab ang suporta sa Kagamhanang Probinsyal niini aron mahimong malinawon ang lalawigan ug magiyahan ang katawhan sa ilang pangadlaw-adlaw nga kinabuhi, subay sa direksyon sa BANGON strategic agenda.
By: Nefilim Diaz/PIO
Hulagway kuha ni: Marvin Gilig/PIO
