NEGOSYO CENTER SA KAPITOLYO, GIBUKSAN NA

Posted: March 16, 2020

87834291_564100600867629_2050417129412362240_o

PORMAL nang gibuksan sa pangagamhanang lokal sa Misamis Oriental ang Negosyo Center nga gitukod sa may Capitol grounds, Lunes, Marso 9, 2020. Kini ang magsilbing one-stop business, investment ug pasalubong center dinhi sa lalawigan.

Si kanhi Department of Trade and Industry – 10 Regional Director ug karon Negosyo Center overseer Ma. Eliza Pabillore nagkanayon mas sayon na dayon sa mga negosyante ang pagpangita’g lugar dinhi sa Misamis Oriental ug dakbayan sa Cagayan de Oro kung hain pwede matukod ang ilang negosyo gamit ang Negosyo Center, ug mas sayon na usab sa mga gagmay’ng magpapatigayon nga mobaligya sa ilang abot isip pasalubong sa nagkadaiyang turista sa ilang pagpauli gikan mibisita dinhi sa Misamis Oriental.

Garbo ni Gobernador Bambi Emano nga makatukod og kaugalingong Negosyo Center nga mahimutang pa gayud sa kapitolyo, hilabina ang tumong niini nga mahataga’g transparensiya kon dayag nga pag-atiman sa atong kapitalista aron mas mosamot pa ang ilang pagsalig nga magtukod sa ilang negosyo dinhi sa Misamis Oriental nga maoy sumbanan sa pagsulbad sa kapobrehon dinhi sa lalawigan.