NANUMPA na ang mga newly-elected ug appointed officers sa Provincial Capitol Employee Multi-Purpose Cooperative (PCEMCO) ning adlawa, Abril 13, 2026. Ang maong oathtaking gipangunahan ni Provincial Administrator Mr. Ruel Gayoso nga gihimo atol sa senemanang pagpakayab sa nasudnong bandila sa hawanan sa Kapitolyo Probinsyal. Ang mga bag-ong opisyales gilangkoban nila Engr. Marilyn Legaspi, REA isip Chairperson; Mr. Andrew Gapuz isip Vice Chairperson; ug uban pang miyembro nga sila Ms. Thelma Azis, Ms. Everlyn Acera, Ms. Marilyn Ebarat, Mr. Filemon Aguilar, Jr., ug Ms. Aileen Libe. Gipahimutang usab ang nagkalain-laing komitiba sa kooperatiba lakip ang Audit and Inventory Committee, Election Committee, Education Committee, Conciliation and Mediation Committee, Credit Committee, Ethics Committee, Gender and Development (GAD) Committee, ug Marketing Committee nga gilangkuban sa nagkalain-laing miyembro.

Matud ni PCEMCO Chairperson Engr. Legaspi, usa sa iyang prayoridad nga plano sulod sa iyang termino mao ang paghatag og health provisions alang sa mga miyembro aron matabangan sila panahon sa emerhensiya ug sakit. Dugang pa niya, ila usab i-review ang mga polisiya sa kooperatiba ug lantawon aron masiguro nga kini angay ug responsive sa panginahanglanon sa mga miyembro. Gipaambit usab ni Legaspi ang iyang inspirasyon sa pag-alagad naggikan sa personal nga kasinatian isip miyembro, diin dako ang natabang sa kooperatiba sa iyang pinansyal nga panginahanglanon sa miaging panahon. Busa, iyang giawhag ang mga empleyado sa Kapitolyo nga wala pa na-miyembro nga mobisita sa ilang buhatan ug motambong sa pre-membership seminar nga ginahimo matag ulahing Miyerkules sa bulan.

Mapasalamaton si Legaspi sa padayon ug walay puas nga suporta nga gihatag ni Governor Juliette Uy alang sa kalamboan sa kooperatiba. Sa kinatibuk-an, ang panumpa sa mga bag-ong opisyales nagtimaan sa bag-ong sinugdanan alang sa PCEMCO, nga nagtinguha sa mas lig-on nga serbisyo ug kaayohan sa mga miyembro.

By: Jane Salimbao/PIO

Hulagway kuha ni: Charm Andy Pacamalan/PIO