SUBAY sa serye sa gipahigayong distribusyon sa Food Packs ngadto sa mga Out-of-School Youth ning bulan sa Oktubre 2021 pinanguluhan sa PSWDO uban ang PYAP- MisOr, ang tanang benepisyaryo nagpadangat sa ilang kinasing-kasing nga pagpasalamat sa walay puas nga pag-abag sa kagamhanang probinsya kanila.

Sayod si Gobernador Bambi Emano nga mas gikinahanglan ang tunhay nga panerbisyo karong panahona hilabina nga lisod ang kapangitaan.

Sa susamang rason dako ang kabahin sa Pag-asa Youth Association of the Philippines- MisOr nga mga opisyales aron sa kahimoan sa nagkadaiyang programa ngadto sa tanang OSY.

Ang inisyatiba ug lakang alang sa kabatan-onan dako og tabang kanila labina gyod ang gitunol nga mga food packs nga mihatag og kalipay ug kahupay sa kalisod nga gisagubang hatod sa pandemya.

Sama nalang ni Ms. Aijen Batua nga lumulupyo sa Brgy. Ane-i sa lungsod sa Claveria atol sa panayam kaniya nga nagsilbing oportunidad ang maong kalihukan nga nalakip sila sa natabangan.

“Sa amo lisod kay nawad-an og trabaho akong papa. Lisod gyod. Thank you sa inyong efforts nga matagaan mi ani. Thank you kay Governor Bambi kay gitagaan mi niya og opportunity mga kabatan-onan,” sulti ni Ms. Batua.

Duna sab sa mga benepisyaryo nga buot mahimong impluwensya ngadto sa ubang kabatan-onan pinaagi sa pagsunod sa mga balaudnon.

“Mahimo kaming example sa ubang youth pinaka-basic ra gyod is follow protocols mintras anaa pa ta sa pandemic,” matud ni Mr. Cristian P. Nellas nga taga- Brgy. Poblacion, Talisayan.

Panghinaot sa mga OSY ning lalawigan nga dili sila mapasagdan sa panggamhanang probinsya nga gipamatud-an sa kasamtangang administrasyon nga bisan pa man daghan hagit, wala gayod nabalda ang paghatod og batakang serbisyo kanila.

“Hinaot unta nga maghantod sa hantod ning programa ni Governor Bambi nga daghan ang matabangan,” mensahe ni Ms. Geralyn Dulanas sa Brgy. Tambagan, Medina.

Malampuson ug mabulokon ang serye sa distribution sa pagpanguna ni PSWDO Out-of-School Youth Program in-charge Ms. Macier Lyn Vidaure uban ang kaikag sa tanang PYAP officers, MSWDOs, SK Federated Chairpersons, mga Youth Program-in-charge ug LGU officials sa matag lungsod ug dakbayan.

Dako na og nahimong kahimoan ang mga naugmad nga programa sa lalawigan sa pagsuporta sa mga kabatan-onan nga mahatagan sila sa pribilehiyo nga molambo ang kinatibuk-ang kinabuhi ug matanyag pa ang ilang mga potential isip inspirasyon  sa uban.

Si Gobernador Bambi mismo dunay dakong panlantaw kanila nga dili lamang magpatarog sa mga pagsulay ug makasugakod sa hingpit inubanan sa pagsalig nga anaa iyang pamunoan mosapnay kanunay.

(KUHA NI ANDY PACAMALAN/PIO)