P10, 000 PARA EX-NPA REBELS, GI-APOD APOD

Posted: May 21, 2020

2152020-11

HUMAN mapahigayon ang profiling sa mga kanhi miyembro sa New People’s Army dinhi sa Misamis Oriental, nakadawat gilayon sila sa hinabang nga tag-P10,000 aron ilang maggamit sa pagbag-ong kinabuhi ug ning kasamtangang hagit sa hulga sa coronavirus disease 2019.
Gipahigayon ang profiling niadtong Abril 30, 2020, sa 58th Infantry Battalion headquarters sa Claveria, Misamis Oriental, sa pagpangulo sa Provincial Social Welfare and Development Office (PSWDO) pinaagi ni PSWDO head Mr. Jhunleymar Abella. Gikabutyag nga P5,000 alang sa panginabuhian ug P5,000 alang sa ilang nag-unang panginahanglan.
Ang nakadawat sa maong ayuda ang 65 sa 211 ka kanhi rebelde nga mitahan ning tuiga, kinsa nahuman na ang profiling.
Wala intawon damha sa mga benepisyaryo nga aduna silay madawat gikan kang Gov. Bambi Emano.
Alang kang 58IB-4ID Commander Lt. Col Ricky Canatoy, dakung epekto kini sa pagdagsang sa motahan nga mga miyembro sa armadong rebelde sa kabukiran, hilabina ilang nabati ang suporta ni Gov. Emano sa ilang mga laraw nga mobalik sa sabakan sa gobyerno aron manimuyo nga malinawon ug produktibo.
Si “Manong Dong,” tinuod nga pangalan gitago, daku usab ang ilang pasalamat sa kapitan sa Eureka tungod nahimo kining tulay aron makabalik sila sa pag-amuma sa gobyerno. Niya pa, maayong tawo si Gov. Emano tungod kay wala kini sila sukad nakabati og diskriminasyon gikan sa pamunuan sa gobernador, inay gipalangga sila ug gihatagan sa ikaduhang higayon. Pasalamat usab sila kang Col. Canatoy tungod kay wala sila sukad pasakiti bisan gamay.