P13 MILYONES KAPIN, GI-APOD APOD PARA SA BRIGADA SKWELA

Posted: June 22, 2020

22062020-6

MISAMIS ORIENTAL – Mapasalamaton ang principal, magtutudlo, magtutungha ug mga ginikanan sa 350 ka elementary ug 71 high school sa entero Misamis Oriental, tungod sa tabang-pinansiyal ni Gov. Bambi Emano kanila alang sa Brigada Skwela sa School Year 2020-2021 nga mikabat sa kapin P13 milyones.
Matud ni Gov. Emano iyang nakita ang panaghiusa sa mga magtutudlo, magtutungha ug ginikanan sa hisgotanang edukasyon, hinungdan nga dili gayud magduhaduha ang Local School Board og tunol sa ayuda ning taliabot nga pagbukas sa klase. Si Gov. Emano ang chairman sa Local School Board sa Misamis Oriental.
Ang Mat-I Central School sa Claveria nakakuha sa daku-daku nga pundo nga mikabat sa P7,178,527.98 alang sa ilang Covered Court with stage ug comfort room projects alang sa komportable ug hamugaway nga pagtungha ug pagpahigayon sa nagkadaiyang kalihukan sulod sa tulunghaan, matud pa ni Mr. Bartolome J. Pallo, ang school Principal.
Misunod ang Initao Comprehensive High School nga nakadawat sa P2,500,000 alang sa panginahanglanon sa ilang tunghaan, kung diin malipayon kining gidawat ni School Principal Mr. Adefer B. Caño.
Laing P3,000,000 pa ang gitunol bag-ohay pa lang ni Gov. Bambi sa 421 alang sa susamang katuyoan.