GIKAN sa mahinungdanong paglusad sa P20 Rice Project kon “Benteng Bigas, Meron Na!” dinhi sa Misamis Oriental ning bulan sa Marso, gihingusgan kini nga mapadayon sa kagamhanang probinsyal. Niadtong Marso 13, 2026 nagpahigayon og laing hugna sa roll-out activity sa nasangpit nga programa sa nagkadaiyang lugar. Gilangkoban kini sa Purok 5 – Brgy. Pangasihan ug Brgy. San Luis sa Gingoog City; Brgy. Pahindong, Medina; ug lakip sa lungsod sa Villanueva. Kahinumdomang ang P20 Rice Project implementation nasubay sa nasudnong programa kung asa nagtinguhang mabaligya sa katawhan ang baratong bugas nga mo-kantidad sa Php20 per kilo. Gisiguro usab nga mga indigent families ug vulnerable sectors ang mahataga’g prayoridad niini.

Hugot ang suporta ni Gov. Juliette T. Uy niini ingon man ang pagpatuman sa affordability agenda ug pagbaton og food security ning probinsya. Sayod ang inahan sa lalawigan nga daling mapakunhod ang kapobrehon kung dunay panaghiusa ug patas nga oportunidad ang tanang katawhan ngadto sa paglambo.

By: Rejiann Ammor R. Maygay/PIO

Photo courtesy: MIO- Villanueva & PAGRO