P3 MILYONES KAPIN AYUDA SA KABUS, GITUNOL SA PSWDO SULOD SA 5 BULAN

Posted: March 16, 2020

88144281_558677791409910_3183658071666720768_o (1)

SULOD sa lima ka bulan, kon Oktubre 2019 hangtud Pebrero 2020, mikabat sa P3, 657,907.94 sa 1,065 ka serbisyo nga natunol sa buhatan sa Provincial Social Welfare Development Office (PSWDO) sa Misamis Oriental ngadto sa mga pinalanggang kabus ni Gobernador Bambi Emano sa lalawigan.

Ang maong ihap sa serbisyo, matud ni PSWDO head Mr. Jhunleymar Abella, naglangkob sa Family Welfare Project, Children & Youth Welfare & Development, Differently Abled Persons, Enhanced Comprehensive Local Integration Program (E-Clip), Aid to Senior Citizens Program ug Aid for Individual in Crisis Situation/Crisis Support Program, susama sa nasunogan ug uban pang kalamidad.

Dugang ni Mr. Abella, ang maong mga serbisyo deretso gilayon gi-aksiyonan sa ilang buhatan, nunot na usab sa mando ni Gobernador Emano nga prayoridad gayud kanunay ang kabus.

Sa tanang departamento sa kapitolyo probinsiyal sa Misamis Oriental, ang Misamis Oriental Care System kon MisOr Cares ug PSWDO ang dalangpanan sa kabus nga nanginahanglan sa ayudang pinansiyal ug medikal. Duha ka institusyon sa kapitolyo nga kasandigan sa tanang panahon sa kabus nga moduol kang Gobernador Bambi Emano panahon sa kalisod.