P324,000 MEAL ALLOWANCE SA KAPULISAN, GITUNOL

Posted: February 21, 2020

86788736_549574052320284_1113026227704168448_n

LAING ayudang pinansiyal nga mokabat sa P324,000 ang gitunol ni Gobernador Bambi Emano ngadto sa Philippine National Police personnel nga naka-assign sa Lugait quarantine station, Lunes, Pebrero 17, 2020, atol sa pagpakayab sa nasudnong bandila sa kapitolyo sa Misamis Oriental.

Ang pundo, matud ni Gobernador Emano, isip meal allowance sa mga personahe sa kwarentinas nga nagkinahangla’g hinabang alang sa 24 oras nga pagbantay batok sa nagkadaiyang hulga sa seguridad, lakip ang pagsulod ug paggawas sa binuhing mananap nga posibleng magdala’g sakit susama sa African Swine Fever (ASF), ug uban pa.

Gidawat ni Police Coronel Ryan Mark Secuya, ang team leader Police Mobile Force, kinsa mapasalamaton sa walay hunong nga ayuda sa gobernador sa tanan nilang operasyon, hilabina sa panginahanglanong pagkaon.

Susama sa mga milabay nga panahon, wala sukad mibalibad si Gobernador Bambi Emano sa kapulisan dinhi sa Misamis Oriental sa tanan nilang hangyo, hilabina kon alang kini sa pagpalig-on sa seguridad dinhi sa lalawigan lakip ang Cagayan de Oro. Prinsipyo sa gobernador, mag-unsa man ang mga programa sa iyang pamunuan kung ang seguridad mapasagdan.