P994,500 AYUDA GITUNOL SA DAY CARE WORKERS

Posted: June 22, 2020

22062020-21

Mikabat sa P994,500 financial assistance ang gitunol sa pangagamhanang lokal sa Misamis Oriental ngadto sa tanang active ug retired child development workers (CDWs) niadtong Martes, Hunyo 16, 2020, isip ayuda ning panahon sa krisis ug pasalamat sa ilang serbisyo sa pag-umol sa maayong kaugmaon sa kabataan.
Gidawat ni Provincial Early Childhood Care and Development (PECCD) Officer Ms. Maryden Ocot ang cheke nga gi-apod apod ngadto sa 726 retired ug active day care teachers, atol sa weekly virtual flag raising sa maong adlaw. Sa milabay nga semana, Hunyo 8-11, gisaulog sa tibuok probinsya ang Child Development Workers Week isip pagdumdom sa pagka bayani sa child development workers ning makabag-o nga panahon.
Mapasalamaton ang tanang retirees sa hinabang nga ilang nadawat kay dakong tabang na kini kanila sa panahon karon sa krises. Nalipay usab si Gobernador Bambi Emano nga makatunol ug tabang ngadto sa mga retired CDWs nga dakog tabang sa pagmatuto sa mga kabataan sa lalawigan.