MAPASIGARBUHONG giila sa Philippine Council for Agriculture and Fisheries (PCAF) ang Misamis Oriental Provincial Agricultural and Fisheries Council (PAFC) nga usa sa mga top nominee nga best AFC sa nasod. Mibisita ang PCAF aron pagasusihon ug pasidunggan ang mga nabuhat sa PAFC ning lalawigan.

Matod ni PCAF National Evaluator Secretariat Christopher Dela Rosa ang ilang mga gilantaw nga mga criteria sa pag evaluate mao ang pagka aktibo ug monitoring sa organisasyon, nabuhat nga mga resolusyon uban ang nasyonal nga mga ahensya, ug uban pa. Gitumbok ni Dela Rosa nga importanteng mapasidunggan ang ilang mga nahimo tungod kay usa sila ka pribadong organisasyon sa mga mag-uuma sa lalawigan.

Samtang gibutyag ni Mylin Tayapad, myembro sa PAFC, usa sa rason nga napili sila nga nominee mao ang ilang dedikasyon sa mga myembro niini nga boluntaryong naghatag sa ilang serbisyo alang sa komunidad. Gidugang ni Tayapad nga sila ang nahimong tingog sa mga mag-uuma aron matubag ang ilang mga gikinahanglan. Samtang nanawagan si siya sa mga mag-uuma nga gikinahanglan nila gihapong maningkamot alang sa kalamboan sa ilang pamilya ug komunidad.

Kahinumdomang hugot ang suporta ni Governor Juliette Uy sa mga mag-uuma tungod kay sila ang pundasyon sa kalamboan sa usa ka ekonomiya. Gipangunahan sa Provincial Veterinary Office (PROVET) ang pagpahigayon sa kalihokan.

By: Nefilim Diaz/PIO

Hulagway kuha ni: Charm Andy Pacamalan/PIO