PAGBATOK SA SUNOG GIPAHIMANGNO NI GOV BAMBI

Posted: March 16, 2020

87972683_558067688137587_1048675995428585472_n

SUNOD-SUNOD nga trahedya sa sunog sa lalawigan sa Misamis Oriental lakip sa dakbayan sa Cagayan de Oro ang natigayon pipila ka adlaw sa dili pa saulogon ang Fire prevention month nga sugdan karong adlawa Marso 01, 2020.

Gani sa niaging semana ubay-ubay nga insidente sa sunog ang natigayon sa lalawigan kon diin usa ka grass fire nahitabu sa lungsod sa Lagonglong, nasunog usab ang mga backhoe nga gipanag-iyahan ni Vice Mayor Estrada didto sa lungsod sa Manticao; pagkasunog sa mechanical shop ug bank house sa lungsod sa Opol ug dakong pag ulbo sa sunog didto sa Palasyo ni Thomas nga gipanag-iyahan nila sa Barangay Kapitan sa San Antonio Jasaan Misamis Oriental nga si Kapitan Charlie Eugenio.

Niadtong Biyernes sa gabii dakong pag-ulbo sa sunog sa Barangay 18 ning dakbayan sa Cagayan de Oro kon diin 25 ka mga balay ang naugdaw.
Gumikan niini nihangyo si Governor Bambi Emano sa katawhan sa lalawigan nga mag-amping diha sa tagsa-tagsa ka mga puloy-anan ug dili mobiya sa mga kabtangan nga nakapansak pa aron malikayan ang sunog hilabina nga ang lalawigan sa Misamis Oriental ang nakasinati og tukmang kainit karon panahona.

“Nagahangyo ako nga magabantay kita sa sunog sa tanan natong gimbuhaton panahon sa pagdagkot sa kandila tungod kay dili tiaw ang atong gibati nga kainit karon sa lalawigan sa Misamis Oriental,” paabot ni Gobernador Bambi sa katawhan.

Midugang ang Gobernador nga sa kanunay siguruhon gayud ang safety aron luwas kita sa sunog, magkat-on sa kanunay aron sunog malikayan ta, ilabina nga karong adlawa sugdan ang Fire prevention Month.