NAGKAHIUSA ang mga miyembro sa Misamis Oriental Provincial Tourism Council atol sa 1st meeting niini niadtong Pebrero 23 ning tuiga. Pipila sa gihisgotan ang pagpalawig sa tourism circuit ug package development, paghimo og Technical Working Group alang sa implementasyon sa Chartered Flight Program sa nasud sa Korea. Lakip niini ang pag install og mga welcome markers sa Laguindingan Airport ug pasalubong stall sa airport ug mga malls, pag-improbar sa Flight 387 Shrine lakip ang pagplano sa mga amenidad sulod sa area.
Gihisgotan usab ang pagpalambo sa diving adventures nga gilaraw nga mapatuman sa mga lungsod sa Libertad, Gitagum, Initao ug Laguindingan, Medina, Talisayan, Balingoan ug syudad sa Gingoog. Gitakda usab nga mag-install og arcs ug signages sa matag lungsod ug syudad sa lalawigan. Samtang, plano usab nga maghimo og Tourist Police Units nga dakong tabang aron masiguro ang kaluwasan ug kahapsay sa probinsya hilabina kung adunay mga turista ug mga bisita, mapakunhod ang krimen sama sa kawat ug mga overpricing ug uban pa.
Gipadayag usab ni Provincial Tourism Council Co-Chairperson Jennie Uy-Mendez ang dakong suporta sa probinsya alang sa umalabot nga kalihokan sa 35th Mindanao Business Conference 2026 karong umalabot bulan sa Agosto. Gihisgotan usab ang pagpromotar sa inclusivity sa mga turista nga musulod sa mga tourist sites ug paghimo og Tourism Enterprise Board alang sa income sharing tali sa Kapitolyo Probinsyal ug mga LGUs. Pipila lamang kini sa mga dagkong lakang nga gituki karon sa konseho sa tinguha nga mas mapalig-on pa ug mapalambo ang turismo sa probinsya.
Nanguna sa panagtigom si Provincial Tourism Council Co-Chairperson Jennie Uy-Mendez kauban si Provincial Tourism Office OIC Ms. Cindy Obeñita ug uban pang tourism stakeholders sama sa MOHARA, ATOM, PIA, PNP, Oro Chamber, Cagayan de Oro Travel and Tours Association ug uban pa. Dako ang pagtuo ni Governor Juliette Uy nga pinaagi sa pagtinabanga sa matag ahensya ug mga tourism stakeholders maangkon ang kabag-ohan ug pagpauswag sa ekonomiya sa Misamis Oriental.
By: Jane Salimbao/PIO
Hulagway kuha ni: Jez Ecuacion/PIO
