PAGTAPOS SA BRIGADA ESKWELA 2021 NGA GIPANGUNAHAN SA DEPED MISOR UG NI GOV. BAMBI NAGMALAMPUSON By: Reymark Carreon Semaña

Posted: September 10, 2021

240602861_926979934579692_5275487590226843285_n

MIDUYOG ang amahan sa lalawigan Governor Bambi Emano sa gipahigayon nga culminating activity sa Brigada Eskwela 2021 adlawng Lunes, Septiyembre 6, 2021 sa Patrocinio National High School, munisipyo sa Claveria, Misamis Oriental.

Nagmalampuson kini nga dakong kalihokan nga nagdala sa tema: “Eskwelahan atong tabangan para sa atong kabataan” diin nakasentro kini sa pagpaningkamot sa Department of Education-Division of Misamis Oriental uban ang panggamhanan sa lalawigan aron nga mapalambo ang sektor sa edukasyon sa lalawigan alang sa kabataan.

Mapasalamaton si Dr. Jonathan Dela Peña , ang Schools Division Superintendent sa Misamis Oriental ngadto ni Governor Bambi sa iyang padayun nga pagsuporta sa ilang panginahanglan aron mapaabot ang dekalidad nga edukasyon sa kabataan.

“Thank you very much for your support gov (Bambi Emano) and Sangguniang Panlalawigan… thanks for this kay na augment gyud ang among resources because how can we bring excellence when we don’t have resources …makasalig mo nga kani amo gyud nga magamit para again mahimong successful ang implementation sa basic education learning continuity plan sa Misamis Oriental niining tuig sa pagskwela sa 2021-2022.” Tipik sa mensahe ni SDS Jonathan Dela Peña.

Sa iyang bahin sab ni Governor Bambi iyang gipaabot nga dili matuman ang iyang mga proyekto ilabina sa sektor sa edukasyon kung dili tungod sa suporta ug pagpaluyo sa mayoriya sa Sangguniang Panlalawigan nga anaa kanunay nagtuo ug nagsalig sa iyang damgo alang sa kaayuhan sa  katawhan sa lalawigan.

“All of the things… naporma nga mga proyekto dili na Bambi Emano lang tungod kay dunay mga Board Members nga nagtabang ug nagtuko sa akong mga programa, misalig sa akong damgo mao nang sayon ko sa paglawig sa pagpangalagad sa inyo.” Mensahe niini atol sa dakong kalihokan.

Anaa mitambong sa mabungahon nga panagtigum ang mayorya sa Sangguniang Panlalawigan, Claveria Municipal Mayor Meraluna S. Abrogar, Schools Division Superintendent sa Misamis Oriental Dr. Jonathan S. Dela Peña,  LSB Project Manager Ms. Caroline Neri ug LSB Secretary Mr. Jerome Mundo.

Anaa usab ang presensya sa Patrocinio NHS Principal nga mao si Jose L. Ambonglay ug MOGCHS Principal Abdon Bacayana, Provincial ECCD Officer Maryden Ocot ug ECCD-Federated President Ms. Marilyn Emania, Public Schools District Supervisors sa Distrito 1 ug 2, mga magtutudlo ug uban pa nga mga dinapit nga bisita.

Sulod sa siyam ka tuig nga paghupot ni Governor Bambi sa iyang pangatungdanan kanunay niini nga gilantaw uban ang iyang mga sinaligan nga mga Board Members ang kaayuhan sa kabataan pinaagi sa pag-implementar og mga programa ug proyekto nga maghatag kanila og oportunidad nga makatungha ug madugangan ang ilang kahibalo nga maoy susi nga matuman ang ilang pangandoy sa kinabuhi sa umaabot.

(HULAGWAY KUHA NI JEZREEL ECUACION/PIO)