PANGGAMHANAN SA MISOR PADAYON SA PAGTUMAN SA SAAD SA TAGA SITIO KALHAAN By: Reymark Carreon Semaña

Posted: September 10, 2021

240759337_926846284593057_44698128264104463_n

NAGPADAYON sa paghatod serbisyo ang panggamhanan sa lalawigan ubos sa liderato ni Governor Bambi Emano ngadto sa katawhan sa Sitio Kalhaan, Barangay Minalwang, lungsod sa Claveria.

Anaa na sa ika-unom nga hugna ang paghatod og tabang sa Provincial Government kon diin ang ilang uwahing pagbisita niadtong adlaw nga Biyernes, Septiyembre 3, 2021.

Nag-unang mga serbisyo nga gitunol sama sa housing materials nga gidala sa mga personahe sa Provincial Social Welfare and Development Office (PSWD) sama sa 550 ka roof sheets, 23 ka kahon nga lansang, 10 ka sako sa bugas ug 2 ka kahon sa adult plus milk nga sa kinatibuk-an mibalor og 680,000.00 alang sa 54 ka pamilya nga sakop sa tribong Higaunon.

Subay tema nga “Restoring Communities, Changing lives: The New Beginning of Kalhaan”, ang maong tabang gikan sa panggamhanan nagtumong nga mobalik na sa ilang malinawon nga pagpuyo sa Sitio Kalhaan ang katawhan tungod kay wala nay angayan kahadlokan nga walhong grupong gumikan anaa na ang presensya sa kasundaluhan sa ilang lugar.

Ang buhatan sa Provincial Agriculture office (PAGRO) nga walay pakyas sa paghatod og serbisyo sa dapit pinaagi sa agrikultura nga mahatag ngadto sa mga pamilya aron adunay maani sa umaabot gikan sa ilang mga umahan.

Kabahin kini sa programa nga ELCAC kon End Local Communist Armed Conflict nga programa ni Presidente Rodrigo Duterte aron mahatagan og atensyon ang mga lugar nga giilang Geographically Isolated and Disadvantaged Area (GIDA).

Dungan sa paghatag og nagkadaiyang serbisyo ang nagkadaiyang ahensiya sa gobyerno nga walay hunong sa pagpaabot og tabang sa maong lugar aron hingpit na nga makabalik sa malinawon nga pamuyo ang mga apektadong pamilya.

Taliwala sa mga hagit sa iyang Administrasyon gumikan sa gisagubang nga pandemya nagpadayon gihapon sa pagtuman si Governor Bambi  sa iyang saad nga mahatagan og malinawon ug malambuon nga panginabuhi ang katawhang Misamisnons nga dili ikalimod sulod sa siyam ka tuig nabati gyud sa katawhan ang iyang kinasing-kasing nga pagpangalagad.

(HULAGWAY KUHA NI JEZREEL ECUACION/PIO)