GIPASIUGDA ni Mayor April Dablio ang mga kalampusan ug programa sa lungsod sa Gitagum atol sa iyang State of the Municipality Address (SOMA) diin iyang gihisgutan ang proyekto sa panubig isip usa sa labing prayoridad nga proyekto ubos sa iyang administrasyon. Gipahayag ni Mayor Dablio nga ang kasaligan ug igo nga suplay sa tubig maoy usa sa labing dakong panginahanglanon sa mga residente sa maong lungsod.
Gawas sa panubig, iyang gipasundayag usab ang nahimo ug giplanong programa sa natad sa imprastraktura , panglawas , edukasyon , agrikultura ug uban pa. Samtang iyang gipaambit ang mga plano alang sa umalabot, gipasalamatan usab ni Mayor Dablio ang padayon nga suporta sa Kagamhanang Probinsyal sa Misamis Oriental. “Ang kalampusan sa among mga programa ug proyekto dili lamang bunga sa pagpaningkamot sa lokal nga kagamhanan kundili resulta usab sa panag-uban sa probinsyal nga kagamhanan ubos sa liderato ni Governor Juliette Uy “ matud pa ni Mayor Dablio.
Gipasamalatan usab niya ang mga konsehal, barangay officials, mga empleyado sa gobyerno ug mga residente nga padayon nga nagsalig ug nagtinabangay aron mapadayon ang kalamboan sa nasangpit nga lungsod. Gitapos ni Mayor Dablio ang SOMA pinaagi sa pag-awhag nga magpadayon ug panaghiusa ug pagtinabangay aron mas daghan pang proyekto ug serbisyo ang mahatod sa katawhan.
By: Ellen Mae Lahinao /PIO
Hulagway ni: Charm Andy Pacamalan/PIO
