MALAMPUSONG nagpahigayon sa Christmas Party 2025 ang Balay Kaugmaon Center sa lungsod sa Claveria ning lalawigan. Ang Pasko sa BKC 2025 adunay temang “Pasko ng pag-asa, isang pamilya sa Balay Kaugmaon para sa pagbangon.” Tumong niini nga mahatagan sa lingaw ning kapaskuhan ang mga kabataang Children in Conflict with the Law (CICL) nga kasamtangang nagpuyo sulod sa maong center.

Atol sa kalihokan, adunay gihimo nga padula, dance presentation sa mga CICL ug staff ug mga nagkadaiyang indigay sama sa dance competition, singing ug drama. Samtang, mihatag usab og snacks ug Christmas packs alang sa tanang mga partisipante isip pahalipay kanila. Sa mensahe ni Regional Trial Court Branch 22 Clerk of Court Ms. Mariah Leah Gamotin-Garde, gidasig niini ang mga CICL nga aduna pa silay hayag nga kaugmaon nga nagpaabot kanila kon magpabilin nga matinumanon sa center.

Samtang, gipaabot ni Assistant Provincial Administrator Ms. Uzziel G. Bacalso ang dakong suporta ni Governor Juliette Uy ngadto sa mga kabataang CICL bisan paman sila nakasala sa balaod. Napuno sa kalipay ug kasadya ang mga kabataan samtang nagtambong ug mapasalamaton tungod kay nabati ang pag-amoma sa gobernadora alang kanila pinaagi sa suporta sa pagkaon, nagkadaiyang trainings, spiritual enrichment, legal support ug uban pa nga mga programa alang kanila.

Nanguna sa kalihokan ang mga personahe sa Provincial Social Welfare and Development Office nga gipanguluhan ni Mr. Jhunleymar Abella ug ni Balay Kaugmaon Center Head Ms. Mary Janiene Pasicaran. Misalmot sa kalihokan ang mga personahe sa Regional Trial Court, Municipal Social Welfare Officers, Spiritual coordinators ug mga CICL sa center. Kahinumduman, sukad sa pag-ingkod ni Governor Uy una nang giatiman niini ang Balay Kaugmaon Center aron mahatagan sa dakong importansya ang mga CICL sa tinguha nga mahatagan sila sa pagtagad samtang matabangan nga mamaayo ang kaugmaon bisan paman sa ilang mga kagahapon.

By: Jane Salimbao/PIO

Hulagway kuha ni: Charm Andy Pacamalan/PIO