PATAK KONTRA POLIO SA MISOR 100.50% NA ANG KALAMPOSAN

Posted: August 11, 2020

1182020-1

GIDAYEG ni Governor Bambi Emano ang buhatan sa Provincial Health Office nga maoy luyo sa kalampusan Patak Kontra Polio sa lalawigan sa Misamis Oriental.

Miaging semana lamang natapos ang ika-upat nga hugna sa polio vaccination sa tibuok lalawigan ug wala nakababag niini ang gisagubang nga krisis sa panglawas hatod sa Corona Virus Disease kon Covid-19.

Atol sa virtual flag raising gianunsyo ni Provincial Health Officer Dr. Jerie Calingasan nga 100.50% nakab-ot sa buhatan ang polio vaccination sa lalawigan.

Sa iyang bahin ni Maria Gina Abang ang Provincial Coordinator sa Expanded Program on Immunization nga taliwala paman sa hulga sa Covid-19 naningkamot ang buhatan lakip mga barangay health workers ug mga health personnel nga malibot ang tanan kabarangayan matagaan lamang sa bakuna ang kabataan nga nag edad sa 0-59 months old.

Dugang pa ni Abang sa ilang paglakaw-lakaw kinahanglan makasubay sa insaktong health protocol aron makalikay sab sa makapatay nga virus.