PORMAL nga gipirmahan ang Memorandum of Agreement (MOA) tali sa Philippine Coconut Authority (PCA) Region 10 ug sa Provincial Government of Misamis Oriental adlawng Miyerkules – Hulyo 29, 2026 sa Unity Hall, Capitol Compound. Alayon kini sa pagpatuman sa Coconut Farmers and Industry Development Plan Local Government Unit Partnership for Coconut Seedlings Production – usa ka programa nga nagtinguha sa pagpalig-on sa industriya sa lubi sa lalawigan.
Pinaagi sa maong kasabutan, ipatuman sa PCA ang Coconut Hybridization Program – Seedfarm Establishment of OPV Parental Palms (CHP-OPV) nga maghatag og dekalidad nga coconut seedlings alang sa pagtanom ug pagbag-o sa kahimtang sa kahoyan. Kabahin sa programa ang pagpalit sa 50,050 ka dekalidad nga coconut seedlings (OPV Tall o Dwarf) gikan sa Provincial Government pinaagi sa Provincial Agriculture Office (PGMO), nga adunay kinatibuk-ang pondo nga ₱4,754,750. Ipagawas ang pondo sa tulo ka hugna: singkwenta (50) porsiyento homan sa pagpirma sa MOA ug pagsumite sa gikinahanglang dokumento, kwarenta (40) porsiyento human mapamatud-an sa PCA nga natanom na ang labing menos 50,050 ka seedlings sa nursery, ug ang nahibiling napulo (10) porsiyento human sa pagdawat ug pag-validate sa kompleto nga delivery reports.
Ang Provincial Agriculture Office maoy mangulo sa implementasyon sa programa pinaagi sa pagdumala sa nursery nga mosunod sa Good Agricultural Practices, pag-atiman sa mga tanom, pagsiguro sa kalidad sa mga seedlings, ug paghatod niini ngadto sa gitakdang dapit sa pag apod-apod. Ang maong panagtambayayong gilauman nga makatabang sa pagpalambo sa produksyon sa lubi ug sa panginabuhi sa mga mag-uumang Misamisnon.
Nakasubay usab kini sa tumong sa administrasyon ni Governor Juliette T. Uy nga mapalig-on ang sektor sa agrikultura sa tibuok lalawigan.
By: Ellen Mae Lahinao/PIO
Hulagway kuha ni: Charm Andy Pacamalan/PIO
