GIBUTYAG ni Bureau of Customs- Collection District X (Port of Cagayan de Oro) District Collector Atty. Manuel Zurbito, Jr. nga andam kini makighiusa kang Governor Juliette Uy alang sa kaayuhan sa kinabag-an. Kini ang pamahayag sa ahensya human mikortesiya sa buhatan sa gobernadora aron personal nga hisgotan ang mga angayan nga buhaton ug mga kolaborasyon sa umalabot. Matud ni Atty. Zurbito, usa sa tutokan niini ang pagsulbad tali sa Panggamhanang Probinsyal kalabot sa kasamtangang suliran sa congestion sulod sa Mindanao Container Port nga nahimutang sa lungsod sa Tagoloan.

Dugang ni Zurbito, padayun ang ilang paningkamot aron masulbad ang maong suliran ug ubay-ubay ang mga gihimo nga miting kauban ang mga stockholders, stakeholders ug uban pa gumikan sa influx sa importation nga miresulta ngadto sa pagdaghan sa mga containers. Pipila sa gitan-aw niini nga sulbad mao ang trade facilitation ug pag-dumala sa lihok sa mga containers. Atol sa panagtigom, giimbitahan usab niini ang gobernadora alang sa umalabot nga kalihokan niini karong bulan sa Pebrero. Mapasalamaton si Zurbito sa mainiton nga pag-abiabi ni Governor Uy sa ilang pagbisita ug sa tabang nga andam ihatag niini alang kanila. Samtang, gipasalig niini nga maningkamot sila aron makakolekta ug motabang alang sa revenue generation sa Kagamhanang Probinsyal.

Kini timaan sa padayun nga pakigtimbayayong sa gobernadora ngadto sa mga ahensya sa gobyerno kay nagtuo kini nga pinaagi sa panaghiusa maangkon ang kalampusan ug kalamboan sa unahan.

By: Jane Salimbao/PIO

Hulagway kuha ni: Jez Ecuacion/PIO