MIKORTESIYA kang Gobernadora Juliette Uy si Katherine Chloe S. De Castro, Director-General sa Philippine Information Agency (PIA), aron mapalig-on ang koordinasyon tali sa nasyonal ug lokal nga panggamhanan sa paghatod og tukma, kasaligan, ug angay sa panahon nga impormasyon ngadto sa katawhan sa Misamis Oriental. Atol sa maong panagtagbo, gipasabot ni Director-General De Castro ang kasamtangang mga inisyatibo sa PIA nga nagtumong sa pagpalig-on sa komunikasyon sa mga komunidad pinaagi sa pagtukod sa Barangay Information Officers Network (BION) sa nagkalain-laing bahin sa nasud. Sa Misamis Oriental, nakigtambayayong na ang PIA sa mga lokal nga panggamhanan sa Villanueva, Opol, Balingoan, ug Manticao alang sa pagtukod sa maong mga information network, ug gilauman nga mapalapdan pa kini ngadto sa ubang mga lungsod sulod ning tuiga.

Gipasalig usab ni Director-General De Castro ang padayon nga paningkamot sa PIA sa paghatag og husto ug kasaligan nga impormasyon aron mapalig-on ang kahibalo sa publiko ug masiguro nga ang panan-awon sa #BagongPilipinas, ingon man ang mga programa ug serbisyo sa nasyonal nga gobyerno, epektibong maabot ug mabati sa matag Pilipino sa Northern Mindanao.

By: Kendra Pacaldo/PIO

Hulagway kuha ni: Jezreel Acuacion/PIO