USA KA DAKONG lakang sa pagpalig-on sa Family Planning sa Probinsya sa Misamis Oriental ang bag-ong milestone nga nahitabo sa MOPH–Gingoog—ang pinaka unang vasectomy nga malampusong gihimo sa maong pasilidad. Kini usa sa mga inisyatibo ni Governor Juliette Uy aron mapakusgan ang Family Planning pinaagi sa pagpalapad sa partisipasyon sa kalalakin-an. Sumala sa Gobernadora, importante nga ang mga lalaki mahimong kabahin sa pagplano sa ilang pamilya aron masiguro ang mas hayag ug lig-on nga kaugmaon sa matag pamilyang Misamisnon. Ang vasectomy usa ka yano ug luwas nga medical procedure alang sa lalaki diin ginaputol o ginaharangan ang agianan sa sperm aron malikayan ang dili planadong pagburos. Kini permanente nga pamaagi sa family planning, apan dali ra ug paspas ang recovery, ug wala kini makapekto sa kusog o performance sa lalaki.
Alang sa kauna-unahang higayon, kini nga serbisyo nahimong available sa MOPH–Gingoog ug libre pa gyud para sa mga kwalipikadong benepisyaryo—usa ka dako nga tabang alang sa mga pamilyang nanginahanglan og lig-on ug responsableng pagplano sa ilang kaugmaon. Ang kalampusan niini nga programa nahimong posible pinaagi sa panagtinabangay sa DKT Philippines Foundation, Misamis Oriental Population Office ubos sa pagpanguna ni Andrew Gapuz, ug Department of Health Region 10 nga gipangulohan ni Sulpicio Henry M. Legaspi Jr. Padayon nga paningkamotan sa Probinsya sa Misamis Oriental ang pag-edukar sa mga magtiayon kabahin sa kahinungdanon sa vasectomy ug uban pang pamaagi sa family planning. Tumong niini nga mapalambo ang kahimtang sa panglawas, ekonomiya, ug kalidad sa kinabuhi sa matag pamilya.
Ang matag pamilya angayan nga adunay hustong kahibalo ug plano—kay ang responsableng pagplano sa pamilya mao ang pundasyon sa mas malig-on ug mauswagon nga komunidad.
By: Zyrus James Gelizon
Hulagway kuha ni: Marvin Giling / PIO
