PERSONAL nga gipresentar ni Asian Pyrochem Technologies, Inc. Chairman and Chief Executive Officer Harley Luis Leaño ang planong $350-milyon nga barter trade deal tali sa Pilipinas ug Indonesia diin usa sa napili ang probinsya sa Misamis Oriental nga mahimong partner. Kini ang iyang gihisgotan atol sa pagbisita sa buhatan ni Governor Juliette Uy niadtong Hulyo 27, 2026. Matud ni Leaño, duha ka local product ang mahimong malakip sa barter trade nga mao ang abaca fiber nga mokabat sa $50 milyones ug iron ore nga nagkantidad og $300 milyones.

Isip baylo, makadawat ang nasud sa mga produkto nga gikan sa Indonesia sama sa garments ug textiles nga puli sa abaca fiber apan gisugyot ni Governor Uy nga urea fertilizer ang ipuli niini tungod sa dakong panginahanglanon sa sektor sa agrikultura. Dako kini og ikatabang sa Misamis Oriental isip usa ka agricultural province hilabina sa mga mag-uuma nga nagtanom og abaca, palay, mais ug uban pa. Pinaagi sa urea fertilizer, mahimong mapakunhod ang gasto sa mga mag-uuma ug makatabang sa pagpalambo sa ilang produksyon ug panginabuhian. Dugang ni Leaño, kini kabahin sa konsepto sa de-dollarization diin ang mga produkto mahimong direktang i-barter inay nga magsalig sa US dollar sa mga transaksyon.

Gidugang usab niini nga dakong potensyal ang mahimo sa abaca ngadto sa international market tungod kay kini mahimong garment, paper products, construction materials, ug alang sa automotive industry. Samtang, ang iron ore dakong tabang alang sa mas lig-on nga supply chain sa steel industry. Lakip nga misalmot sa kalihokan sila Philippine Fiber Industry Development Authority (PhilFIDA) Regional Director Engr. Eugene N. Galela, Provincial Board Member Princess Emano, Provincial Agriculture OIC Ms. Michelle Lace ug Consultant Mr. Jojo Rom.

Padayon pa ang pagpaningkamot ni Governor Uy nga matabangan ang mga mag-uuma sa probinsya pinaagi sa pakigtimbayayong sa mga national ug international stakeholders.

By: Jane Salimbao/PIO

Hulagway kuha ni: Marvin Gilig/PIO