GIHISGUTAN sa 2nd Provincial Monitoring & Evaluation Committee (PMEC) meeting ning tuiga ang mga gikinahanglang lakang aron makab-ot ang Single Digit Poverty Incident rate sa lalawigan. Lakip gilantaw ang poverty threshold sa lalawigan diin sa ulahing datos gikan sa Philippine Statistics Authority (PSA) anaa na sa 16.3% ang poverty incident rate among families. Kini dunay pag-ubos kompara sa miaging survey. Gibutyag usab ni PSA Mis Or Provincial Census Coordinating Board Co-chairperson Maria Liza Bigornia nga dakog ikatabang sa pagsulbad sa kapobrehon ang kooperasyon sa tanan. Nagpasalamat usab si Bigornia sa aktibong pagdumala ni Gov. Peter “Sr. Pedro” Unabia.

Lakip sa giuyonan ang individual target income nga dul-an tres mil (Php 2,864) pesos matag bulan ug sa matag pamilya kinahanglang kapin katorse mil (Php 14,320) pesos matag bulan. Target sa kagamhanang lokal nga makuha ang 8 to 9% nga poverty incidence sa lalawigan pag-abot sa tuig 2028. Gilantaw ang programang Adopt a Barangay nga epektibong paagi sa pagsiguro sa kalamposan sa maong plano. Sulod sa kasamtangang administrasyon ubay-ubay na ang natunol nga mga proyekto sama sa imprastraktura, edukasyon, panlawas, pangempleyo, ug uban pa.

Ang maong tigom gipangunahan ni Provincial Administrator John Venice Ladaga uban nila ni Provincial Planning and Development Officer Archimedes Lazaro, Chief-of-Staff Richel Pajara ug PSA Mis Or Provincial Census Coordinating Board Co-chairperson Bigornia.

Kabahin kini sa tinguhang makubsan ang kalisod sa lalawigan subay sa SDPI Program ug PAGLAUM agenda sa gobernador ubos sa letrang P kon participatory governance.

By: Rejiann Ammor R. Maygay/PIO

Hulagway kuha ni: Mel Theresa Ruales/PIO