PROGRAMA ALANG SA SENIOR CITIZEN, NAGPADAYON

Posted: March 16, 2020

87960852_559993604611662_7475045168828121088_n

ISA sa gihataga’g hibug-aton sa administrasyong Emano sa Misamis Oriental mao ang atong mga ginikanang senior citizens. Mao nga pinaagi sa Provincial Social Welfare and Development Office (PSWDO), nagpadayon ang mga programa alang kanila.

Gani, gikan sa Oktubre 2019 hangtud Pebrero 2020, mikabat na sa P177,700 ang natunol ngadto sa katigulangan nga natunolan sa financial assistance pampalit sa tambal ug laboratory examinations. Matud ni PSWDO head Mr. Jhunleymar Abella, hugot nga mando ni Gobernador Emano nga dili balibaran ug pasagdan ang katigulangan hilabina kadtong nag-ilaid sa kalisod ug gipasagdan na sa ilang mga mahal sa kinabuhi.

Dugang sa opisyal, dili tiaw ang kasinatian sa katigulangan kon maghambin kini sa balatian unya walay laing kadangpan. Mao nga bukas gayud kanunay ang buhatan sa PSWDO alang kanila. Kung kaniadto nagkarap-karap sa pagpangita’g kadangpan ug kaduolan ang katigulangan dinhi sa Misamis Oriental, gisiguro sa pamunuan ni Gobernador Bambi Emano, pinaagi sa PSWDO, nga matubag gayud ang ilang panginahanglanon.