NAGPADAYONang roll-out activity sa “BENTENG BUGAS” nga programa sa lalawigan diin malampuson nga gipahigayon sa Brgy. Barra, Opol, Brgy.Consuelo, Magsaysay ug Brgy. Rizal lungsod sa Claveria adlawng Miyerkules- Abril 8, 2026. Ang Programa nagtumong sa paghatag og barato nga bugas sa katawhan diin mapalit kini sa kantidad nga P20 matag kilo. Matag Panimalay adunay kahigayonan nga makapalit ug lima (5) ka kilo nga bugas aron masiguro nga mas daghang benipisyaryo ang makaangkon sa maong tabang gikan sa gobyerno. Dako ang Pasalamat sa usa sa benipisyaryo nga si Mr. Dante Ebarat sa maong programa tungod kay dako na kini ug tabang hilabi na sa kasamtangang kahimtang sa presyo sa mga palaliton nga nagkataas. Ang maong Programa nagpadayon pa sa uban pang mga barangay ug lungsod sa tibuok lalawigan aron mas daghan pang Misamisnon ang maka-angkon sa barato og dekalidad nga bugas.

Kahinumduman nga ang maong Programa gisuportahan sa inahan sa lalawigan Governor Juliette Uy kinsa nagpadayon sa mga inisyatiba nga direktang makatabang sa panginahanglan sa katawhan.

By: Ellen Mae Lahinao/PIO

Hulagway kuha ni: Marvin Gilig/PIO