PROTECTIVE GEAR BATOK COVID-19, GITUNOL SA KAPULISAN

Posted: March 17, 2020

90038758_567563877187968_7507111978775609344_o

SA panghinaut nga dili unta mataptan sa sakit nga dala sa Coronavirus Disease 2019 (COVID-19) ang kapulisan sa Misamis Oriental nga nahimong frontline karon sa medical attendants aron pugsanong madala sa balay-tambalanan ang gituhoang natakboyan sa nasangpit nga virus, gisiguro ni Gobernador Bambi Emano nga matunolan sa protective equipment.

Lakip sa kalihukan sa hamubo nga sinemanang pagpakayab sa nasudnong bandila sa kapitolyo, Lunes, Marso 16, 2020, ang ceremonial turnover sa cover-all-head suit, head cap, shoe cap, hand cloves, goggles, ug N95 mask. Gidawat kini ni Philippine National Police (PNP) Region 10 chief of staff Col. Rolando Destura ug Misamis Oriental Provincial Police Director Robert Roy Bahian.

Dakung pasalamat ni Col. Bahian sa gitunol sa Gobernador. Karon, dili na matud pa sila magduhaduha’g paduol ug hawid sa mga pasyente nga adunay COVID-19. Samtang, nanawagan kini sa publiko nga dili mahadlok sa pag-report sa pinakaduol nga istasyon sa kapulisan kon adunay namatikdan o gusto magpa-konsulta kay adunay gibati sa lawas, hilabina kon gihilantan.

Lakip mga barangay officials, municipal health officers, barangay health workers, gipanawagan niini nga makigtambayayong sa otoridad hilabina kon adunay gusto respondehan nga pasyente, hilabina niadtong mobalibad pagsunod sa protocol sa health experts.