MIBISITA ang Provincial Population Office (PPO) sa mga lungsod sa westeng bahin sa Misamis Oriental aron magtunol og meal allowance sa mga Barangay Population Volunteer (BPV) – Mayo 12, 2026. Mokabat sa P 84,000 ang kinatubik-ang kantidad nga gitunol sa 76 nga BPV gikan sa Lugait, Manticao, Libertad, Gitagum, Alubijid, El Salvador City, ug Opol. Matod ni Iresh Grecia, BPV sa Brgy. Poblacion, Opol, dakog kini og tabang kanila tungod kay sila mismo ang gabisita sa mga panimalay aron mag edukar sa katawhan kabahin sa birth control, labina sa mga kabataan.
Mapasalamaton usab siya kang Governor Juliette Uy tungod sa iyang direktiba nga matagaag direksyon ang kabatan-onan pinaagi sa paghatag og mga programa kanila nga makatabang sa ilang kaugmaon. Kahinumdomang usa sa mga aksyon ni Governor Uy ang pagpakunhod sa teenage pregnancy sa lalawigan isip chairwoman sa Social Development Committee (SDC) sa Regional Development Council (RDC) 10. Kauban sa PPO ang Integrated Provincial Community Assistance Center (IPCAC) sa pagpangapod apod sa allowances sa mga BPV.
Samtang magpadayon pa ang pagapod-apod sa PPO sa mga BPV sa mga kalungsuran sa lalawigan aron masiguro nga aktibo ang ilang paghatag serbisyo sa katawhan. Subay usab kini sa pagpatuman sa BANGON strategic agenda ni Governor Juliette Uy.
By: Nefilim Diaz/PIO
