NAGKATIGOM ang nagkadaiyang stakeholders sa sektor sa agrikultura pinaagi sa gipahigayong Stakeholders’ Round Table discussion sa Provincial Agriculture Office niadtong Mayo 18, 2026. Kini aron mapalig-on pa ang koordinasyon ug pagtinabangay sa mga ahensya nga nag-alagad alang sa kalamboan sa agrikultura sa probinsya. Lakip sa mga mitambong nga ahensya mao ang Deparment of Agriculture, Philippine Coconut Authority, Agriculture Training Institute, National Food Authority, National Tobacco Administration, Department of Trade and Industry, Philippine Fiber Industry Development Authority, Department of Science and Technology, Bureau of Soils and Water Management, Mindanao State University-Naawan, Bureau of Fisheries and Aquatic Resources ug Technical Education and Skills Development Authority.

Gipresentar sa matag ahensya ang ilang mga updates, programa ug mga kalampusan nga nahimo isip kabahin sa padayon nga pagpalambo sa sektor sa agrikultura ug paghatag suporta sa mga mag-uuma ug mangingisda sa probinsya. Atol sa open forum, gipadayag ni Mr. Roy Hugo Pagtalunan, MAO sa Tagoloan, ang kabalaka bahin sa epekto sa El Niño sa mga seednuts ug nangayo og irrigation support alang sa mga lubi. Mitubag ang PCA nga kinahanglan magsumite og Letter of Intent aron maendorso sa PhilMech tungod kay wala kini sa ilang direktang serbisyo. Nangutana usab siya sa PAGRO kabahin sa drilling rig services diin gipahibalo nga kinahanglan adunay water source ang requester ug moprovide sa casing ug pump samtang himuon ang area validation. Gipangutana usab niya ang DA-Livestock mahitungod sa isyu sa Liquid Nitrogen Tank nga nakaapekto sa Artificial Insemination activities, ug mitubag ang DA nga kasamtangan nang nagpadayon ang procurement niini.

Samtang, si Mr. Philip Saligumba, representante sa LUFALIA-Alubijid, mihangyo og suporta sa macapuno production ngadto sa PCA nga mitubag nga kinahanglan magsumite og Letter of Intent ug proof of land ownership. Nangutana usab siya sa ATI kabahin sa Accredited Learning Site ug cash assistance diin gipahibalo nga kinahanglan adunay andam nga farmer ug farm nga adunay existing technology ug andam nga ipaambit. Kinahanglan usab adunay proof of ownership o usufruct agreement sa yuta. Sumala sa ATI, ang cash assistance mahimong moabot hangtod Php150,000 depende sa partnership ug collaboration.

Hugot ang pagtuo ni Governor Juliette Uy nga pinaagi sa lig-on nga panaghiusa sa mga stakeholders, mas mapalapad pa ang mga programa ug serbisyo nga makatabang sa pagpausbaw sa produksyon, panginabuhian ug food security sa lalawigan.

By: Jane Salimbao/PIO

Hulagway kuha ni: Marvin Gilig/PIO